أبرز ما جاء في الرسالة:

من أول يوم تجوزت فيه شفت قديش حماتي بتخاوز بكلشي كرمال ترضي كنتها مرت البكر وخصوصي انهو دار سلفي كتير أغيناء

حماتي على طول بتوخد ولاد ابنها الكبير مشاوير وبتشتريلهن هدايا وبتعطيهن مصاري وشو ما بدهن وبتلعبهن وبنفس الوقت بتتجاهل ولادي ولا كأنهن أحفادها

يشهد علي الله انو سلفتي ما هي احسن مني بالعكس سلفتي وحدة قوية وبتخوف كمان متل الداهية بس شو هي بنت عيلة ونا ونسب مش متلي يا حسرة مقطوعة من شجرة

وصلت الى موقع العرب رسالة من سيدة تطلب ارشاد ونصيحة زوار موقع العرب الكرام. موقع "العرب" يؤكد انه وحفاظا على النزاهة والمصداقية الصحفية ينشر الرسالة تماما كما وصلت الى مكاتبنا، من دون زيادة او نقصان، وبدون تعديلات لغوية او تصحيح اخطاء املائية.

الرسالة هي التالية:

مرحبا.. انا سيدة من قرية في الشمال بالعشرينات من عمري متزوجة وعلاقتي بجوزي واولادي الحمد لله ممتازة ويشهد علي الله اني ما بغضب اهلي حتى لا اغضب ربي، مطيعة لزوجي وأهله بس مش عم بقدر اتخلص من الشعور اللي ملازمني من اول يوم تجوزت فيه وهو تعامل حماتي مع سلفتي مرت الإبن البكر في العيلة.

صورة توضيحية فقط!

من أول يوم تجوزت فيه شفت قديش حماتي بتخاوز بكلشي كرمال ترضي كنتها مرت البكر وخصوصي انهو دار سلفي كتير أغيناء وانا وجوزي من الموت نقدر نصرف على البيت. المشكلة يا زوار موقع العرب الكرام انو انا خلفت وعندي ولدين متل القمر وفكرت انو الاطفال ممكن يغيروها لحماتي بس طلعت غلطانة لانها على طول بتوخد ولاد ابنها الكبير مشاوير وبتشتريلهن هدايا وبتعطيهن مصاري وشو ما بدهن وبتلعبهن وبنفس الوقت بتتجاهل ولادي ولا كأنهن أحفادها. انا وجوزي منتبهين على هاد الشي بس مش قادرين نلاقي حل وكزا مرة جوزي حكا معها بس قوية بتطلعله ميت ألف حجة. أنا بصراحة يأسانة من الوضع لإنو مش طبيعي وبيزهق وحرام عليها هيك تعاملنا. او الغني كل الناس بترقص فيه والفقير ما حدا داري فيه؟ هو يعني ولاد ابنها الكبير أحفادها واحنا ولادنا مش أحفادها؟ يشهد علي الله اني ما بزعلها ويشهد علي الله انو سلفتي ما هي احسن مني بالعكس سلفتي وحدة قوية وبتخوف كمان متل الداهية بس شو هي بنت عيلة ونا ونسب مش متلي يا حسرة مقطوعة من شجرة.

هل أهاجر؟
موقع العرب انا مش عارفة شو أساوي لدرجة من كتر ما بنقهر بيجي على بالي اهاجر انا وجوزي وولادي. يا ريت اكون فشيتلكو خلقي بركي برتاج شوي وبتمنى اسمع منكو نصائح تفيدني وشكرا لموقع العرب اللي اتاحلنا هاي الفرصة نعبر فيها عن ذاتنا والسلام عليكم ورحمة الله وبركاته.

يطلب موقع "العرب" من زواره عدم التعقيب بصورة طائفية عنصرية وعدم الانجرار وراء معقبين عنصريين، وتسعى إدارة موقع "العرب" بتشديد الرقابه على التعقيبات وبحذف جميع التعقيبات التي تمس بأي طائفة. كما نلفت انتباهكم انه يمكنكم ارسال مشاكلكم على العنوان التالي: alarab@alarab.co.il